अभियान सुरु गरेको तीन दिनमा १३ हजार पशुलाई लम्पी स्किनविरुद्धको खोप लगाइयो

हेटौंडा\ बागमती प्रदेश सरकारको कृषि तथा पशुपन्छी विकास मन्त्रालयले अभियान सुरु गरेको तीन दिनमा १३ हजार पशुलाई लम्पी स्किनविरुद्धको खोप लगाएको छ ।

यसअघि बिहीवारबाट मन्त्रालयले खोप अभियान सुरु गरेको थियो । ५० हजार पशुलाई खोप लगाउने लक्ष्य लिएको मन्त्रालयले शनिवारसम्म १३ हजार पशुमा खोप लगाएर लम्पी स्किन संक्रमणको रोकथाम र नियन्त्रणमा प्रयास गरिरहेको मन्त्रालयका सूचना अधिकारी अनुप अधिकारीले जानकारी दिए । आइतबार लगाइएको खोपको तथ्यांक भने सोमबार मात्रै प्राप्त हुने मन्त्रालयले जानाएको छ ।

खोप अभियान अन्तर्गत बिहीवार, शुक्रबार र शनिवार तीन दिनमा १३ हजार ५ सय १६ पशुलाई लम्पी स्कीन रोगविरुद्ध खोप लगाइएको हो ।
‘आइतबारको तथ्यांक प्रदेशको जिल्लाहरुबाट प्राप्त हुन बाँकी नै छ । शनिवारसम्म १३ हजार भन्दा बढी पशुमा खोप लगाइसक्यौं ।,’ अधिकारीले भने । अभियानको पहिलो दिन ४ हजार ४ सय ६७ लाई खोप लगाइएको थियो । दोस्रो दिन ४ हजार ६ सय ९४ पशुलाई र तेस्रो दिन ४ हजार ३ सय ३३ पशुलाई लम्पी स्कीनविरुद्धको खोप लगाइएको मन्त्रालयका सूचना अधिकारीले बताए ।

उक्त अभियानअन्तरगत पछिल्लो तीन दिनमा सबैभन्दा बढी चितवनका पशुलाई खोप लगाइएको छ । त्यहाँ २ हजार ४ सय ८८ पशुमा लम्पी स्कीन रोगविरुद्धको खोप लगाइएको मन्त्रालयका सूचना अधिकारीले बताए ।
यसैगरी, मकवानपुरका २ हजार ४४, काभ्रेका १ हजार ५ सय २२, सिन्धुलीका १ हजार १९८, धादिङका १ हजार ५५, काठमाडौंका १ हजार ४२, नुवाकोटका ९९८,
रामेछमपका ९८२, सिन्धुपाल्चोक ८५६, रसुवा ५८३, भक्तपुर ५५४, ललितपुरका १७ र दोलखाका ८३ पशुमा लम्पी स्कीन रोगविरुद्धको खोप लगाइएको हो ।

अभियान आगामी साउन ३२ गतेसम्म संचालन हुनेछ । एकपटक खोप लगाईएको गाई÷भैंसी वा चौरीलाई एकवर्षसम्म लम्पी स्किन रोगविरुद्ध काम गर्छ । यो खोप बिरामी पशुलाई लगाउन नहुने र स्वस्थ्य पशुमा मात्रै लगाइने पशु स्वास्थकर्मीले जनाएका छन् ।
हाल प्रदेशको सबै जिल्लामा गरी २ लाख ४ हजार ९८८ पशु लम्पी स्किनबाट प्रभावित छन् । जसमा १ लाख १० हजार ४४० पशु सक्रिय संक्रमित छन् । हालसम्म ६ हजार २९१ वटा पशुको मृत्यु भइसकेको छ । प्रकोप फैलिएसँगै १ लाख ३२ हजार ९ सय पशुलाई खोप लगाइसकिएको छ । यो खोप लगाबापत किसानले पैसा तिर्नु पर्दैन । यो खोप लगाइएपछि गाई भैंसी वा चौंरीलाई एक वर्षसम्म एन्टिभाइरसको रुपमा काम गर्ने मन्त्रालयका पशुविकास अधिकृत निशान्त शर्माले बताए ।

लम्पी स्किन संक्रमणका कारण सामन्यतया १० देखि २० प्रतिशत पशुहरु बिरामी हुने र करिब ५ प्रतिशतसम्म मृत्युदर देखिन सक्ने उनले बताए । खास उपचार नभएको र लम्पी स्किनको कारण धेरै संख्यामा गाई÷भैसी प्रभावित भई दूध उत्पादनमा ८० प्रतिशतसम्म कमी आएको मन्त्रालयले जनाएको छ । लम्पी स्कीन विरुद्धको खोप अभियानमार्फत प्रदेश भरी लम्पी स्किन न्यूनीकरणका लागि जनचेतना फैलाउने काम पनि सँगै गरिने मन्त्रालयका सचिव शरणकुमार पाण्डेले बताए ।