हेटौंडामा क्रिक्सल प्रतियोगिता सुरु

हेटौंडा/ बागमती प्रदेशको राजधानी हेटौंडामा पहिलो पटक क्रिक्सल प्रतियोगिता सुरु भएको छ । हेटौंडा उपमहानगरपालिका वडा–४ को आयोजनामा आइतबारदेखि सुरु भएको हो । हेटौंडा–४ कमलडाँडास्थित फुटसल कोर्टमा भएको प्रतियोगिताको उद्घाटन खेलमा कर्रा सुपर किंगले विजयी सुरु सुरुवात गरेको छ । टस जितेर पहिले व्याटिङमा उत्रिएको कर्रा सुपर किंगले प्याटन युथ क्लबलाई १९ रनले हराएको छ ।

कर्राले ६ ओभरमा ३ विकेट गुमाएर प्याटन क्लबलाई ४५ रनको लक्ष्य दिएकोमा प्याटन क्लबले ६ ओभरमा ४ विकेटको क्षतिमा २५ रन मात्र बनाउन सफल भएको हो । कर्राको तर्फबाट सुमनले १३ रन, रिजन ढकालले १५ रन र निरजले ९ रन बनाएका थिए । यस्तै, प्याटन क्लबको तर्फबाट आदेशले १८ बनाएका थिए । म्यान अफ द म्याच कर्राका रिजन ढकाल घोषित भए ।

प्रतियोगिताको उपाधि विजेता टिमले २५ हजार रुपैयाँ र उपविजेता टिमले १५ हजार रुपैयाँसहित शिल्ड, मेडल तथा प्रमाणपत्र प्राप्त गर्नेछन् । यस्तै, प्लेयर अफ द टुर्नामेन्टका लागि पनि पुरस्कारको व्यवस्था गरिएको छ । प्रतियोगिता सोमबारसम्म संचालन हुनेछ । प्रतियोगितामा १६ वटा टिमको सहभागिता रहेको आयोजकले जनाएको छ ।