
हेटौंडा/देशको अर्थतन्त्र संकटग्रस्त भएको भन्दै चिन्ता व्यक्त भइरहँदा बागमती प्रदेश सभाका सदस्यहरुले भने यो वर्ष पनि दशैँ भत्ता लिएका छन् । निर्वाचित, राजनीतिक नियुक्तिलगायतका पदमा रहेका व्यक्तिले दशैँ भत्ता नलिने मान्यताविपरीता प्रदेश सभा सदस्यहरुले यो वर्ष पनि भत्ता बुझेका हुन् । यसअघिको विकृत परम्परालाई नयाँ सभाले पनि निरन्तरता दिएको हो ।
प्रदेश सभा सचिवालयका अनुसार सांसदको दशैँ भत्तामा ८५ लाख रुपैयाँ खर्च भएको छ । बागमती प्रदेशका सांसदहरूले एक महिना बराबरको दसैँ भत्ता पाएका हुन् । शिक्षकहरूले तलब नपाइरहँदा बागमती प्रदेश संसद् सचिवालयले दसैँ भत्ताबापत सांसद् र उनीहरूका स्वकीयका लागि ८५ लाख रुपैयाँभन्दा बढी रकम उपलब्ध गराएको हो । अर्थतन्त्र संकट रहँदा नागरिकको क्रयशक्ति समेत घटिरहेको भन्दै व्यवसायीले पनि चिन्ता व्यक्त गरिरहँदा सभा भने उल्टो बाटो हिँडेको हो । सांसद र स्वकीयलाई ८५ लाख ११ हजार ५ सय ५० रुपैयाँ भत्ताबापत वितरण गरिएको सचिवालयले जानकारी दिएको छ ।

दसां भत्ताबापतको रकम ९५ जना सांसदहरूलाई ४९ लाख ५९ हजार रुपैयाँ र स्वकीय सचिवहरूलाई ३२ लाख ९९ हजार ३ सय ५० रुपैयाँ सम्बन्धित बैंक खातामार्फत दाखिला गरिएको बागमती प्रदेशसभा सचिवालयका लेखाअधिकृत बालकृष्ण अधिकारीले जानकारी दिए । अधिकारीका अनुसार सभामुख, उपसभामुख र प्रतिपक्षी दलका नेतालाई भत्ताबापत १ लाख ७७ हजार र तीनका स्वकीयहरूलाई १ लाख १२ हजार २ सय २८ रुपैयाँ दसैँ खर्चबापत भत्ता वितरण गरिएको छ ।
प्रदेशका मुख्यमन्त्री एवं ११ जना मन्त्रीहरू र तीनका स्वकीय सचिवहरूको दसैँ भत्ता भने मुख्यमन्त्री कार्यालयबाटै जाने हुँदा प्रदेशसभामा तथ्यांक नहुने लेखा अधिकृत अधिकारीले जानकारी दिए । दसैँ भत्ताबापत सभामुखले ६१ हजार चार सय ५० रुपैयाँ, उपसभामुख र प्रमुख प्रतिपक्षी दलका नेताले ५८ हजार रुपैयाँ, सचेतकहरूले ५४ हजार पाँच सय २० रुपैयाँ र प्रदेशसभा सदस्यले ५२ हजार दुई सय रुपैयाँ दसैँ भत्ता लिएका छन् ।
बागमतीमा हालसम्म संसदीय समितिका सभापतिहरुको टुंगो नलागेको हुँदा सभापतित्व गर्ने ज्येष्ठ सदस्यहरूलाई सांसदकै तलब बराबरको भत्ता दिइएको संसद सचिवालयले जनाएको छ । प्रदेशसभाका सभामुखका स्वकीय सचिवले उपसचिव सरह ४० हजार तीन सय ८० रुपैयाँ, शाखा अधिकृत सरहले ३५ हजार ९ सय ९०, उपसभामुख र प्रमुख प्रतिपक्षी दलको नेताको स्वकीय सचिवले शाखा अधिकृत सरह ३५ हजार ९ सय ९० र बाँकी सांसदहरुको स्वकीय सचिवले नायव सुब्बा सरह ३४ हजार ७ सय ३० रुपैयाँ चाडपर्व भत्ता खर्च शीर्षकमा दसैँभत्ता बुझेका छन् ।
सभामुख भुवनकुमार पाठकले ऐनअनुसार नै भत्ता दिइएको बताए । ‘प्रदेशसभा सचिवालयले नियमानुसार भत्ता वितरण गरिएको हो । हामीले नियम नै बनाएर पारिश्रमिक तोकेका छौँ,’ सभामुख पाठकले भने ।
बागमतीमा कांग्रेसको ३७, माओवादी २१, एमालेको २७, राप्रपाको १३, एकीकृत समाजवादीको ७ सिट छ भने नेमकिपाको ३ र हाम्रो नेपाली पार्टीको २ सिट छ । यहाँ माओवादीको नेतृत्वमा कांग्रेस र नेकपा (एकीकृत समाजवादी) को गठबन्धन सरकार छ ।

प्रतिक्रिया दिनुहोस्